TTCL YAPONGEZWA KWA FAIDA YA SHILINGI BILIONI 22.9
Serikali ya Jamhuri ya Muungano wa Tanzania imeendelea kusisitiza dhamira yake ya kuimarisha usimamizi na ufanisi wa Shirika la Mawasiliano Tanzania (TTCL), kufuatia mafanikio ya Shirika hilo kurejea katika faida na kuonyesha mwelekeo chanya wa ukuaji wa kibiashara.
Waziri wa Mawasiliano na Teknolojia ya Habari, Mhe. Angellah Jasmine Mbelwa Kairuki, ameeleza kuwa Serikali itaendelea kusimamia kwa karibu utendaji wa TTCL ili kuhakikisha linafanya kazi kwa tija, linaongeza ushindani sokoni, na kuendelea kutoa mchango mkubwa katika maendeleo ya sekta ya mawasiliano nchini.
Akitoa taarifa kwa Rais wa Jamhuri ya Muungano wa Tanzania, Mhe. Dkt. Samia Suluhu Hassan, Waziri Kairuki alisema kuwa TTCL imepata faida ya shilingi bilioni 22.9 (kabla ya kodi) katika mwaka wa fedha 2024/25. Alibainisha kuwa mafanikio hayo ni matokeo ya maboresho ya kiutendaji, usimamizi madhubuti wa rasilimali, pamoja na utekelezaji wa mikakati ya kibiashara inayolenga kuongeza mapato na kupunguza gharama.
Taarifa hiyo ilitolewa wakati wa hafla ya uzinduzi rasmi wa upanuzi wa Mkongo wa Taifa wa Mawasiliano (National ICT Backbone) na makabidhiano ya miundombinu ya mawasiliano kwa Serikali, iliyofanyika tarehe 10 Aprili 2026 katika Ukumbi wa Mikutano wa Kimataifa wa Jakaya Kikwete jijini Dodoma. Hafla hiyo ilihudhuriwa na viongozi mbalimbali wa Serikali, wadau wa sekta ya mawasiliano, pamoja na taasisi za umma na binafsi.
Katika hafla hiyo, Serikali ilizindua rasmi upanuzi wa Mkongo wa Taifa wa Mawasiliano unaolenga kuongeza upatikanaji wa huduma za intaneti zenye kasi na uhakika katika maeneo mbalimbali ya nchi, hususan vijijini na maeneo ambayo hayajafikiwa kikamilifu na huduma za mawasiliano. Aidha, makabidhiano ya miundombinu hiyo kwa Serikali yanaimarisha udhibiti, usalama na uendelevu wa rasilimali za kimkakati za TEHAMA.
Kwa sasa, TTCL inaendelea kutekeleza Mpango Mkakati wa Biashara wa miaka 10 unaolenga kuibadilisha taasisi hiyo kuwa mtoa huduma wa kisasa, shindani na anayejiendesha kibiashara kwa ufanisi. Mpango huo umejikita katika kuimarisha miundombinu ya mawasiliano, kuboresha huduma kwa wateja, kuwekeza katika teknolojia bunifu, pamoja na kuongeza vyanzo vya mapato.
Hatua hizi zinadhihirisha nafasi ya TTCL kama mhimili muhimu katika kuchochea uchumi wa kidijitali nchini, sambamba na juhudi za Serikali za kujenga Tanzania ya kidijitali (Digital Tanzania) inayowezesha upatikanaji wa huduma za mawasiliano kwa wote, kuimarisha ubunifu, na kuongeza ushindani wa taifa katika uchumi wa kimataifa.
